Şirkət rəhbərləri əməkdaşları şəxsi mesajlar əvəzinə daha çox açıq Slack kanallarından istifadə etməyə təşviq edirlər. Məqsəd Sİ agentlərinin daha geniş kontekstə çıxış əldə etməsi, yazışmaları təhlil etməsi, görüşləri xülasələşdirməsi, təqdimatlar hazırlaması və qərarvermə prosesinə dəstək göstərməsidir.
Redaksiya xəbər verir ki, Zapier şirkətinin baş direktoru Veyd Foster əməkdaşlara mümkün qədər açıq kanallarda yazışmağı tövsiyə edir. Foster bu yaxınlarda bir müştəri ilə bağlı iki aylıq Slack yazışmalarını Sİ agentinə təhlil etdirərək, müştəri ilə görüş zamanı həmin məlumatlardan təqdimat hazırladıb.
ElevenLabs isə bu yanaşmanı daha da genişləndirib. Şirkətin daxili ünsiyyəti Slack üzərindən aparılır və Sİ agenti təxminən 100 açıq kanaldakı yenilikləri toplayaraq əməkdaşların dinləyə biləcəyi podkasta çevirir.
Bu yanaşmanın məntiqi ondan ibarətdir ki, Sİ nə qədər çox korporativ məlumata çıxış əldə edirsə, onun hazırladığı xülasələr, təqdimatlar və tövsiyələr də bir o qədər faydalı ola bilər.
Bununla yanaşı, şəxsi mesajlar əməkdaşların sərbəst fikir mübadiləsi apardığı, narazılıqlarını ifadə etdiyi və həssas mövzuları müzakirə etdiyi məkan olaraq qalır. Yazışmaların geniş şəkildə Sİ sistemləri üçün əlçatan edilməsi iş yerində ünsiyyət mədəniyyətini dəyişə və məxfiliklə bağlı ciddi suallar yarada bilər.