Qətərin mayeləşdirilmiş təbii qaz — LNG ixracının Hörmüz boğazındakı böhran fonunda son altı ayda 96 faiz azaldığı bildirilir. Reuters-in ICIS məlumatları əsasında apardığı hesablamaya görə, ölkə bu dövrdə təxminən 24 milyard dollar qaz gəlirindən məhrum olub.
Redaksiya istinadla xəbər verir ki, Qətər ötən ilin eyni dövründə 509 LNG yükü ixrac etdiyi halda, bu il cəmi 18 yük göndərə bilib. Bu azalma təxminən beş aylıq milli gəlirə bərabər itki kimi qiymətləndirilir.
Hörmüz boğazının faktiki olaraq bağlanması və Ras Laffan kompleksinə dəyən zərər Qətərin ixrac imkanlarını kəskin məhdudlaşdırıb. Nəticədə qlobal LNG təchizatının əhəmiyyətli hissəsi bazardan kənarda qalıb.
ABŞ-nin LNG ixracı yaranan çatışmazlığın bir hissəsini kompensasiya edib. Bununla yanaşı, Avropada qaz anbarlarının doluluq səviyyəsinin mövsüm üçün tarixi minimumlara yaxın olduğu bildirilir.
Mövcud vəziyyət davam edərsə, Qətərin ixrac gəlirləri ilə yanaşı, qlobal qaz qiymətləri və Avropanın enerji təhlükəsizliyi üzərində də əlavə təzyiq yarana bilər.