Milyarder investor Uorren Baffet süni intellekt modelləri və məlumat mərkəzlərinə yönəldilən yüz milyardlarla dollarlıq sərmayələrin çox yüksək gəlir yaratmalı olduğunu bildirib. Onun fikrincə, böyük risk daşıyan investisiyalar ABŞ xəzinə istiqrazlarından əldə edilə biləcək təhlükəsiz gəliri əhəmiyyətli dərəcədə üstələməlidir.
Redaksiya xəbər verir ki, Baffet “Berkshire Hathaway”in böyük nağd vəsait ehtiyatını ABŞ dövlət istiqrazlarına yerləşdirərək, demək olar ki, risksiz şəkildə ildə 20–40 milyard dollar qazana biləcəyini qeyd edib. O, bütün potensial investisiyaları bu göstərici ilə müqayisə etdiyini bildirib.
Baffetin sözlərinə görə, yaxşı biznes mahiyyət etibarilə risksiz investisiyaların gəlirindən xeyli artıq qazanc təmin etməlidir. Bu yanaşmaya əsasən, Sİ şirkətlərinin yüksək kapital xərcləri yalnız uzunmüddətli və davamlı mənfəətlə əsaslandırıla bilər.
İnvestor “American Express”i üstünlük verdiyi biznes modelinə nümunə göstərib. Baffet qeyd edib ki, bir çox bank kapitaldan təxminən 13–14 faiz gəlir əldə etdiyi halda, “American Express” uzun müddət ərzində 30 faizdən yüksək nəticə göstərib və bunu əhəmiyyətli dərəcədə əlavə risk götürmədən bacarıb.
Baffetin yanaşmasına görə, Sİ sektorunun əsas sınağı texnoloji imkanlardan daha çox iqtisadi səmərəliliklə bağlıdır. Şirkətlər nəhəng investisiyaları əsaslandırmaq üçün yalnız sürətli artım deyil, onilliklər boyu qoruna biləcək yüksək kapital gəlirliliyi nümayiş etdirməlidirlər.