ABŞ-nin “Capital One” bankı Tramp Təşkilatı, Erik Tramp və əlaqəli şirkətlərə aid təxminən 385 hesabın bağlı saxlanılmasını istəyib. Bank hesabların 2021-ci ildə çirkli pulların yuyulmasına qarşı daxili yoxlamadan sonra bağlandığını bildirib. Bu barədə “Reuters” məlumat yayıb.
Redaksiya istinadla xəbər verir ki, “Capital One” federal məhkəməyə təqdim etdiyi sənəddə qərarın aylarla aparılan təhlilin nəticəsi olduğunu qeyd edib. Bankın açıqlamasına görə, bəzi əməliyyatlar federal qaydalarda şübhəli fəaliyyət göstəricisi kimi təsvir olunan nümunələrlə uyğunluq təşkil edib.
“Capital One” bununla yanaşı, Tramp ailəsini və ya onun şirkətlərini birbaşa çirkli pulların yuyulmasında ittiham etmədiyini vurğulayıb. Bank hesabların siyasi səbəblərlə bağlanması barədə iddiaları rədd edərək, qərarın daxili siyasət və tənzimləyici göstərişlər əsasında verildiyini bildirib.
Tramp Təşkilatı və Erik Tramp isə hesabların bağlanmasını siyasi ayrı-seçkilik kimi qiymətləndirərək banka qarşı məhkəmə iddiası qaldırıblar. Onların fikrincə, qərar 2021-ci ildə Donald Tramp və onun siyasi baxışları ilə bağlı yaranmış vəziyyətin təsiri altında qəbul edilib.
Məhkəmə daha əvvəl iddianın bəzi versiyalarını yetərsiz əsaslandırma səbəbindən rədd etsə də, sənədlərin yenidən təqdim edilməsinə imkan verib. Tərəflər arasında hesabların bağlanmasının həqiqi səbəbi ilə bağlı hüquqi mübahisə davam edir.