İsrail məhkəməsi milli təhlükəsizlik naziri İtamar Ben-Qvirin Ketsiot həbsxanasının ətrafını timsahlarla əhatə etmək planının icrasını müvəqqəti dayandırıb. Qərar layihəyə qarşı heyvan hüquqları təşkilatının müraciətindən sonra qəbul olunub. Bu barədə “i24NEWS” məlumat yayıb.
Redaksiya istinadla xəbər verir ki, təşkilat planın heyvanların rifahı, təhlükəsizlik standartları və hüquqi əsasları ilə bağlı ciddi suallar yaratdığını bildirib. Məhkəmə məsələ üzrə əlavə araşdırma aparılanadək layihənin həyata keçirilməsinə icazə verməyib.
Ben-Qvirin təşəbbüsünün həbsxananın mühafizəsini gücləndirmək və qaçış cəhdlərinin qarşısını almaq məqsədi daşıdığı qeyd olunur. Lakin planın texniki icrası, timsahların saxlanma şəraiti və insanların təhlükəsizliyi ilə bağlı təfərrüatlar açıqlanmayıb.
Məhkəmənin müvəqqəti qərarı layihənin tam ləğvi demək deyil. Tərəflərin arqumentləri dinlənildikdən və hüquqi qiymətləndirmə başa çatdıqdan sonra yekun qərarın veriləcəyi gözlənilir.