Fransa Prezidenti Emmanuel Makron Rusiyanın Ukraynaya qarşı son hava hücumlarını sərt şəkildə tənqid edib.
Redaksiya məlumat verir ki, Makron Rusiyanın son dörd ildə Ukraynada mülki şəxslərə qarşı ən böyük dron və raket hücumunu həyata keçirdiyini bildirib.
Fransa liderinin sözlərinə görə, yaşayış məntəqələri və mülki əhalinin hədəfə alınması Rusiyanın gücünü deyil, zəifliyini göstərir. O vurğulayıb ki, mülki şəxslərə qarşı hücumlar beynəlxalq humanitar hüquqa ziddir.
Makronun açıqlaması Kiyev və digər Ukrayna şəhərlərinə qarşı genişmiqyaslı hava zərbələri fonunda səslənib. Ukrayna tərəfi hücumlar nəticəsində ölən və yaralananların olduğunu, yaşayış infrastrukturlarına ciddi ziyan dəydiyini bildirir.
Fransa son aylarda Ukraynaya siyasi və hərbi dəstəyi artıran Avropa ölkələrindən biri kimi çıxış edir. Paris Rusiyaya qarşı təzyiqin davam etdirilməsinin vacibliyini vurğulayır.