İsrail kosmosdakı hərbi imkanlarını genişləndirməyi və gələcəkdə orbitdən Yer üzündəki hədəflərə zərbə endirə biləcək sistem hazırlamağı planlaşdırır. Bu barədə Haaretz məlumat yayıb.
Redaksiya istinadla xəbər verir ki, İsrailin müdafiə naziri İsrael Kats ölkəsinin real kosmik zərbə qabiliyyəti yaradan ilk dövlət olmağı hədəflədiyini bildirib.
Plan çərçivəsində daha müasir peyklərin, təhlükəsiz rabitə sistemlərinin, kiber müharibə imkanlarının və raketdən müdafiə texnologiyalarının inkişaf etdirilməsi nəzərdə tutulur.
Müzakirə olunan ideyalardan biri ABŞ-də “Rods from God” adı ilə tanınan konsepsiyaya əsaslanır. Bu nəzəri yanaşmada ağır volfram çubuqlarının orbitdən çox yüksək sürətlə Yerə yönəldilməsi və nüvə partlayıcısından istifadə etmədən möhkəmləndirilmiş hədəflərə güclü kinetik zərbə vurulması nəzərdə tutulur.
Məlumata görə, İsrail kosmik proqramlara 10 il ərzində təxminən 16 milyard şekel, yəni 5,4 milyard dollar ayırmağı nəzərdən keçirir. Lakin maliyyələşdirmə ilə bağlı yekun qərar hələ qəbul edilməyib.
Orbitdən zərbə konsepsiyasının hazırda hansı texniki mərhələdə olduğu və real silah sisteminə çevrilib-çevrilməyəcəyi barədə dəqiq məlumat açıqlanmayıb.