İran tərəfi Hörmüz boğazında ABŞ Hərbi Dəniz Qüvvələrinə aid hədəfə zərbə endirdiyini bəyan edib. İlkin məlumata görə, hadisə Vaşinqtonun “Project Freedom” adı altında neytral gəmiləri boğazdan çıxarmağa hazırlaşdığı vaxt baş verib.
Redaksiya İran dövlət mediası və Reuters-ə istinadla xəbər verir ki, Tehran ABŞ qüvvələrinin Hörmüz boğazına müdaxiləsini atəşkəsin pozulması kimi qiymətləndirəcəyini əvvəlcədən bildirmişdi. İran Silahlı Qüvvələrinin vahid komandanlığı boğazda təhlükəsiz keçidin yalnız İran hərbçiləri ilə koordinasiya əsasında mümkün olduğunu açıqlamışdı.
İran rəsmiləri bildirirlər ki, Hörmüz boğazının təhlükəsizliyi Tehranın nəzarətindədir və ABŞ Hərbi Dəniz Qüvvələrinin bölgəyə daxil olması “sərt cavab” doğuracaq. Bu fonda İran mediası ABŞ donanmasına qarşı zərbə iddiasını Vaşinqtonun yeni müşayiət planına cavab kimi təqdim edir.
ABŞ tərəfi hadisə ilə bağlı hələlik rəsmi təsdiq yaymayıb. Pentaqon və ABŞ Mərkəzi Komandanlığından açıqlama olmadığı üçün zərbənin miqyası, hədəfin növü və mümkün itkilərlə bağlı məlumatlar dəqiqləşdirilir.
Hörmüz boğazı qlobal enerji daşımaları üçün əsas marşrutlardan biri sayılır. Bölgədə ABŞ və İran arasında hərbi gərginliyin artması neft bazarları, ticarət gəmiləri və regional təhlükəsizlik üçün ciddi risk yaradır.