Braziliyada güclü tropik leysanların arabika qəhvəsi məhsulunun təxminən 20 faizinə zərər vurduğu bildirilir. Bunun fonunda iyun ayından bəri arabika üzrə fyuçers qiymətləri təxminən 35 faiz artıb və bazarda təklif çatışmazlığı ilə bağlı narahatlıqlar güclənib.
Redaksiya xəbər verir ki, aqronom-bioloq Mixail Vorobyov əsas riskin yalnız hazırkı məhsul itkisi ilə məhdudlaşmadığını bildirib. Onun sözlərinə görə, çiçəkləmə dövründə güclü yağışlar tozlanma prosesini poza və gələcək məhsul dövrlərinə də mənfi təsir göstərə bilər.
Mütəxəssis qeyd edib ki, yağış çiçəklərdəki tozcuqları yuyur, əlverişsiz hava şəraitində isə tozlandırıcı həşəratların fəaliyyəti azalır. Qəhvə meyvələrinin yetişməsi təxminən yarım il çəkdiyi üçün indiki problemlərin 2027-ci ilin məhsuluna da təsir göstərə biləcəyi bildirilir.
Bununla belə, ekspertlər qəhvənin tam yoxa çıxması və ya bazarda kəskin böhran gözləmirlər. Braziliya arabikanın ən böyük istehsalçısı olsa da, yeganə tədarükçü deyil və bazarda ehtiyatlar mövcuddur.
Marketoloq Denis Fedorenko iri qəhvə şirkətlərinin bu cür riskləri qiymət siyasəti və hedcinq mexanizmləri ilə idarə etdiyini bildirib. Onun fikrincə, bu yanaşma qiymətlərin qəfil sıçrayışının və istehlakçılar üçün kəskin şokun qarşısını qismən ala bilər.
Ekspertlər logistika və yüksək rütubətlə bağlı risklərin də hazırda kritik səviyyədə olmadığını qeyd edirlər. Daşınma xərclərinin artsa belə, bunun qəhvə qiymətlərində avtomatik və kəskin bahalaşma yaradacağı gözlənilmir.