Avropa Komissiyası Ukraynanın silah və hərbi texnika alışı üçün 6,1 milyard avro məbləğində yeni maliyyə paketi ayırıb. Bu barədə Avropa Komissiyasının açıqlamasında bildirilib.
Redaksiya istinadla xəbər verir ki, maliyyələşdirmə hava hücumundan və raketdən müdafiə sistemləri, raketlər, döyüş sursatları və radarların alınmasını əhatə edir.
Yeni paket daha əvvəl təsdiqlənmiş 16 milyard avroluq satınalma planlarını tamamlayır. Həmin məbləğin 8,35 milyard avrosunun artıq ödənildiyi bildirilir.
Brüssel silah tədarükünün əhəmiyyətli dərəcədə artırılmasını istəyir. Bunun üçün Aİ ölkələrinin mövcud hərbi anbarlarından daha çox istifadə edilməsi, kommersiya sifarişlərində prioritetlərin dəyişdirilməsi və hərbi istehsalın təcili şəkildə genişləndirilməsi nəzərdə tutulur.
Ümumi dəstək proqramı çərçivəsində 2026-2027-ci illərdə Ukraynaya 30 milyard avro büdcə yardımı və 60 milyard avro hərbi dəstək ayrılması planlaşdırılır. Bunun 28,3 milyard avrosunun 2026-cı ildə Ukraynanın müdafiə-sənaye potensialının gücləndirilməsinə yönəldilməsi nəzərdə tutulur.