Honda özünün əfsanəvi sedan modelini yenidən təqdim etməyə hazırlaşır. 2027-ci ildə təqdim olunması gözlənilən yeni nəsil Civic, 90 kq daha yüngül şassi, təkmilləşdirilmiş hibrid sistem və müasir dizayn detalları ilə diqqət çəkəcək. Avtomobil dünyasının ən köklü modellərindən biri olan Honda Civic, 12-ci nəsil ilə qarşımıza çıxmağa hazırlanır.
Redaksiya məlumat verir ki, yeni modelin həm dizayn, həm də texnologiya baxımından əhəmiyyətli yeniliklər təqdim edəcəyi artıq müzakirə olunmağa başlanıb. Yeni Civic-in rəsmi dizaynı hələlik açıqlanmasa da, avtomobilin intensiv kamuflaj altında test edilərkən çəkilmiş fotoları yayılıb. Bu fotolardan ilhamlanan dizayner Theophilus Chin, firmanın cari dizayn dilindən bəhrələnərək hazırladığı render şəkillərlə avtomobil həvəskarlarına yeni nəsil Civic-in potensial görünüşü barədə məlumatlar təqdim edir.
Yeni nəsil Civic-in xüsusilə Honda e:NS2 kimi elektrik modellərində rast gəlinən kəskin LED far imzası və yenilənmiş bamper dizaynı ilə daha zərif və texnoloji görkəmə sahib olacağı gözlənilir. Avtomobil yan profildən baxıldığında mövcud BMW 5 Seriyası sedanını xatırladan bir siluet nümayiş etdirir ki, bu da modelin ənənəvi dizayn xətti üçün olduqca iddialı bir istinad nöqtəsidir. Avtomobilin ən diqqət çəkici cəhətlərindən biri istifadə olunacaq yeni platform olacaq. Honda-nın yaydığı məlumatlara görə, yeni memarlıq sayəsində avtomobil cari modelə nisbətən təxminən 90 kq daha yüngül olacaq. Bundan əlavə, daha aydın sükan reaksiyası, balanslı yol tutumu və gücləndirilmiş gövdə quruluşu da vəd edilir.
Honda yeni nəsildə e:HEV hibrid sisteminin ən son versiyasından istifadə edəcək. 2.0 litrlik dörd silindrli benzin mühərrikini iki elektrik mühərriki ilə birləşdirən bu sistemin yanacaq səmərəliliyində 30% civarında bir yaxşılaşma təmin etməsi hədəflənir. Həmçinin, avtomobildə ilk dəfə Prelude modelində görünən və fiziki ötürücü qutusu olmamasına baxmayaraq, səs və dartı idarəetməsi ilə ötürücü keçid hissi yaradan "Honda S+ Shift" sistemi də yer alacaq. Honda, yeni Civic-in hissələrinin təxminən 60%-ni HR-V, CR-V və Accord kimi digər modelləri ilə ortaq istifadə etməyi planlaşdırır. Bu strategiya tədqiqat və inkişaf xərclərini azaldarkən, yeni modellərin bazara təqdim edilmə müddətini də sürətləndirəcək. Yeni Civic-in bazara çıxarıldıqdan sonra yenilənmiş Toyota Corolla, Hyundai Elantra və Kia K4 kimi güclü rəqiblərlə rəqabət aparması gözlənilir.