Türkiyə Yunanıstan-Kipr elektrik bağlantısı layihəsi çərçivəsində Fransa gəmisinin fəaliyyət göstərdiyi əraziyə yaxın bölgədə dəniz parkı elan edib. Bu barədə Yunanıstanda nəşr olunan Proto Thema məlumat yayıb.
Redaksiya istinadla xəbər verir ki, sözügedən ərazi Şərqi Aralıq dənizində enerji və dəniz yurisdiksiyası ilə bağlı həssas bölgələrdən biri hesab olunur.
Nəşrin qiymətləndirməsinə görə, Türkiyənin həmin ərazilərə hərbi gəmilər göndərməsi vəziyyəti ciddi şəkildə dəyişə və layihənin həyata keçirilməsinə əlavə təhlükəsizlik və siyasi risklər yarada bilər.
Hazırda Türkiyənin bu addımı konkret hərbi yerləşdirmə ilə müşayiət edib-etmədiyi barədə əlavə məlumat açıqlanmayıb. Məsələ Ankara, Afina və Nikosiya arasında dəniz səlahiyyətləri ilə bağlı mövcud fikir ayrılıqları fonunda diqqətlə izlənilir.