ABŞ-nin Türkiyədəki səfiri Tom Barrak bildirib ki, Ankara İsrailə qarşı aqressiv və ya hücum xarakterli mövqe tutmadığını açıq şəkildə ifadə edib.
Redaksiya xəbər verir ki, Barrak Türkiyənin İsraillə hərbi və ya birbaşa qarşıdurmaya girmək istəmədiyini vurğulayıb. Onun sözlərinə görə, Ankara suveren və müstəqil Suriyanın formalaşmasını istəyir və ABŞ də eyni məqsədi dəstəkləyir.
Barrak bildirib ki, İsrailin də əsas məqsədi suveren və sabit Suriyanın mövcudluğu olmalıdır. O, İsrailin yeni Suriya hakimiyyəti ilə bağlı ilkin narahatlıqlarının müəyyən əsaslarının olduğunu qeyd edib.
ABŞ səfiri tərəflər arasında kiçik və mərhələli addımlarla qarşılıqlı etimadın qurulacağına ümid etdiyini deyib. O, son hadisələrin bu prosesdə müəyyən geriləmələr yaratdığını, lakin bunun müvəqqəti olduğunu düşündüyünü bildirib.