İşğal altındakı İordan çayının Qərb sahilində, Nablusa bağlı Kusra qəsəbəsində israilli məskunlaşanların fələstinli ailələrin evlərini mühasirəyə alması Vaşinqtonun sərt reaksiyasına səbəb olub. İsrail ordusu bölgəyə əlavə piyada batalyonu göndərmək qərarı verib.
Redaksiya xəbər verir ki, ABŞ administrasiyası və Konqresdəki bəzi rəsmilər israilli məskunlaşanların Kusradakı zorakı hərəkətlərindən dərin narahatlıq keçirdiklərini İsrail tərəfinə çatdırıblar. ABŞ rəsmilərinin hadisələr qarşısında şoka düşdüklərini bildirdikləri və İsrail ordusunun fələstinlilərə qarşı hücumların qarşısını niyə ala bilmədiyini sorğuladıqları qeyd olunur.
Məlumata görə, ABŞ rəsmiləri baş verənləri İsrailin Vaşinqtondakı müttəfiqləri baxımından böyük biabırçılıq adlandırıblar. Ağ Evin yüksək vəzifəli nümayəndəsinin məsələni müzakirə etmək üçün İsrail Baş naziri Benyamin Netanyahunun ofisi ilə əlaqə saxlamasının planlaşdırıldığı bildirilir.
Kusrada üç fələstinli ailənin evlərinə gedən yolun israilli məskunlaşanlar tərəfindən çadırlar və daşlarla bağlandığı bildirilir. Ailələr üç gündür evlərindən çıxa bilmədiklərini və ərzaqla digər əsas ehtiyaclarını təmin etməkdə çətinlik çəkdiklərini deyirlər.
İsrail ordusu bölgədə nizam-intizamı və əməliyyat nəzarətini gücləndirmək, oxşar hadisələrin təkrarlanmasının qarşısını almaq məqsədilə Kusra ərazisinə əlavə piyada batalyonunun göndərildiyini açıqlayıb.
İsrailin B'Tselem insan haqları təşkilatı isə Kusra hadisələrinin ayrı-ayrı insident olmadığını bildirərək Qərb sahilində fələstinlilərin məcburi köçürülməsinin sürətləndiyini iddia edib. Təşkilatın məlumatına görə, 2023-cü ilin oktyabrından bu yana 4 min 800-dən çox fələstinli yaşadığı ərazidən köçürülüb.