Polşada genişmiqyaslı məlumat sızması ilə bağlı iddia ortaya çıxıb. Hakerlər 18,8 milyondan çox unikal PESEL nömrəsinin olduğu məlumat bazasını ələ keçirdiklərini bildiriblər. Bu barədə RMF24 məlumat yayıb.
Redaksiya istinadla xəbər verir ki, kibertəhlükəsizlik üzrə mütəxəssis hücumçuların onun çalışdığı nəşrlə birbaşa əlaqə saxladığını bildirib. Hakerlər məlumat bazasının həqiqətən onların əlində olduğunu sübut etmək üçün mütəxəssisin öz şəxsi məlumatlarını ona təqdim ediblər.
Məlumata görə, kibercinayətkarlar sübut kimi Polşanın aparıcı siyasətçilərindən birinə aid məlumatları da göstəriblər. Hakerlərin iddiasına əsasən, ələ keçirilmiş bazada 18,8 milyondan çox unikal PESEL identifikasiya nömrəsi mövcuddur.
PESEL Polşa vətəndaşlarının və ölkədə qeydiyyata alınmış müəyyən şəxslərin identifikasiyası üçün istifadə olunan fərdi nömrədir. Hakerlərin açıqladığı rəqəm təsdiqlənərsə, hadisə ölkə əhalisinin böyük hissəsini əhatə edən ciddi şəxsi məlumat sızması hesab oluna bilər.
Hadisənin dəqiq miqyası, məlumatların hansı sistemdən əldə edildiyi və hakerlərin iddia etdiyi 18,8 milyon PESEL nömrəsinin hamısının etibarlı olub-olmadığı barədə rəsmi təsdiq hələ açıqlanmayıb.