Səudiyyə Ərəbistanı sentyabrın 11-də pilotsuz uçuş aparatlarının hücumundan sonra fəaliyyətini dayandıran Şərq-Qərb neft boru kəməri ilə xam neft nəqlini tədricən bərpa edir. Bununla belə, Qırmızı dəniz sahilində yerləşən Yanbu terminalından tankerlərlə ixrac hələ yenidən başlamayıb. Bu barədə Reuters agentliyi məlumat yayıb.
Redaksiya istinadla xəbər verir ki, hazırda kəmərlə daşınan xam neft əsasən Səudiyyə Ərəbistanının Qırmızı dəniz sahilindəki neft emalı zavodlarına yönəldilir. Saudi Aramco eyni zamanda sistemdə nəql həcmini artırır və ixracın təhlükəsiz şəkildə bərpası üçün təzyiq sınaqları aparır.
Məlumata görə, hücum nəticəsində boru kəmərinə xidmət edən üç nasos stansiyası zədələnib. Kəmər aşağı sürətlə yenidən işə salınıb və tam gücün bərpasının bir neçə həftə çəkə biləcəyi bildirilir.
Sentyabrın 24-dən 27-dək Yanbu terminalında təxminən altı tankerin xam neft yükləməsi planlaşdırılır. Bu daşımaların başlanması Səudiyyə Ərəbistanının Qırmızı dəniz üzərindən neft ixracının mərhələli şəkildə normallaşmasının əsas göstəricilərindən biri olacaq.