Müstəqil jurnalist Aleks Hit Time üçün yazdığı məqalədə OpenAI-nin ofisində iki həftə keçirdiyini və şirkət daxilində yeni Sİ sistemlərinin imkanları ilə bağlı ciddi narahatlıq müşahidə etdiyini bildirib. Onun səfəri Hugging Face insidentinin araşdırıldığı dövrə təsadüf edib.
Redaksiya xəbər verir ki, Hitin sözlərinə görə, adətən Sİ təhlükəsizliyi ilə məşğul olmayan tədqiqatçılar belə təhlükəsizlik işlərinə qoşulub, hesablama resurslarının bir hissəsi monitorinq və qoruyucu sistemlərə yönəldilib.
Avqustun əvvəlində VIP müştərilər üçün keçirilən qapalı nümayişdə OpenAI “Astra” adlı modeli təqdim edib. Sem Altman sistemi “əhəmiyyətli səviyyədə həqiqətən yeni şeylər ixtira edə biləcək ilk model” kimi xarakterizə edib. Nümayiş zamanı Astra-nın bir neçə agenti riyazi sübut üzərində koordinasiya etməsi, masaüstü proqramlarla çox yüksək sürətlə işləməsi, təqdimatlar və maliyyə hesabatları hazırlaması, məlumatları təhlil etməsi göstərilib.
Modelin günlərlə, hətta həftələrlə fasiləsiz işləməsi, edilən düzəlişləri yadda saxlaması, digər agentlər və insanlarla qarşılıqlı əlaqə qurması üçün hazırlandığı bildirilir. OpenAI-nin Astra-nı korporativ proqram təminatında işləməyə xüsusi şəkildə öyrətdiyi və şirkətin müəssisə bazarında mövqeyini gücləndirməyi hədəflədiyi qeyd olunur.
ChatGPT-nin inkişafına uzun müddət rəhbərlik etmiş Nik Törli isə artıq OpenAI-nin yeni korporativ məhsullar bölməsinə rəhbərlik edir. Şirkət proqramlaşdırmadan kənara çıxaraq iqtisadiyyatın iri sahələri üçün ixtisaslaşmış tətbiqi həllər hazırlamağı planlaşdırır.
OpenAI həmçinin daim işləyən agentlər üçün yeni interfeys üzərində çalışır. Şirkət nümayəndələrinin sözlərinə görə, bu sistem ayrıca tətbiq kimi yox, müxtəlif mühitlərdən əlçatan olan və uzunmüddətli tapşırıqları yerinə yetirə bilən yeni platforma kimi təqdim ediləcək.
Altman son daxili nəticələrə əsasən OpenAI-nin Süni Ümumi İntellektə — SÜİ-yə “çox yaxınlaşdığını” bildirib. Onun sözlərinə görə, 2026-cı ilin sonuna qədər şirkət daxilində SÜİ adlandıra biləcəyi bir sistemin yaranması mümkündür.
OpenAI-nin baş elmi rəhbəri Yakub Paçotski isə şirkətin Sİ tədqiqatçısı-stajyor səviyyəsində işi avtomatlaşdırmaq üçün qoyduğu daxili hədəfə artıq çatdığını deyib. Onun sözlərinə görə, Astra eksperiment ideyasını qəbul edə, onu OpenAI-nin kod bazasında reallaşdıra, sınağı keçirə və nəticələri təqdim edə bilir. Sistem həmçinin elmi məqaləni götürərək insan mütəxəssisinin təxminən bir həftəsini ala biləcək işi yerinə yetirə bilir.
OpenAI gələcəkdə humanoid robotlar yaratmağı da planlaşdırır. Bununla belə, Altmanın fikrincə, ilk mərhələdə məlumat mərkəzlərinin tikintisi və digər robotları istehsal edən robot sistemləri şəxsi ev robotlarından daha prioritet istiqamətlər olacaq.