Konqo Demokratik Respublikasının şərqində yeni Ebola alovlanması təsdiqlənib.
Redaksiya Africa CDC və Associated Press-ə istinadla xəbər verir ki, İturi əyalətində 246 şübhəli yoluxma halı qeydə alınıb, azı 65 nəfərin öldüyü bildirilir. Daha yeni məlumatlarda ölüm sayının 80-ə çatdığı da qeyd olunur.
İnfeksiya ocaqları əsasən Monqvalu və Rvampara səhiyyə zonalarında aşkarlanıb. Bunia şəhərində də şübhəli hallar qeydə alınıb. İlkin laborator testlərdə Ebola virusu nümunələrin bir hissəsində təsdiqlənib.
Səhiyyə qurumları xəstəliyin Bundibugyo ştammı ilə bağlı ola biləcəyini bildirirlər. Bu ştamm Konqoda daha nadir görülür və Zaire ştammından fərqli olaraq, onun üçün geniş istifadə olunan lisenziyalı vaksin yoxdur.
Qonşu Uqandada da Konqodan gələn şəxslə bağlı Ebola ölümünün qeydə alınması regional yayılma riskini artırıb. Africa CDC, ÜST və bölgə ölkələri sərhəd nəzarəti, kontakt izləmə və təcili tibbi cavab tədbirlərini gücləndirməyə çalışır.
Ebola yüksək ölüm riski daşıyan təhlükəli virus xəstəliyidir. Virus əsasən yoluxmuş şəxslərin bədən mayeləri, çirklənmiş səthlər və bəzi hallarda xəstə və ya ölü vəhşi heyvanlarla təmas yolu ilə yayılır.