Kanadanın Baş naziri Mark Karni hökumətinin son bir il ərzində ABŞ-ın Kanadaya qarşı mümkün hərbi addım atması ssenarisini də nəzərdən keçirdiyini açıqlayıb. O, belə bir ssenarinin əsas ehtimal olmadığını, lakin dövlət rəhbərliyinin ən ekstremal riskləri belə hesablamalı olduğunu bildirib. Bu barədə The New York Times məlumat yayıb.
Redaksiya istinadla xəbər verir ki, Karni bunu risklərin idarə olunmasının bir hissəsi kimi qiymətləndirib. Baş nazir ABŞ-ın hərbi müdaxiləsini real və gözlənilən ssenari kimi təqdim etmədiyini, lakin belə bir ehtimalı ümumiyyətlə nəzərə almamağın məsuliyyətsiz davranış olacağını deyib.
Karni eyni zamanda Kanadanın strateji sahələrdə ABŞ-dan asılılığını azaltmağa çalışdığını bildirib. Ottawa İlon Maskın Starlink peyk rabitə sistemindən asılılığı azaltmaq, alternativ peyk imkanlarını genişləndirmək və ABŞ istehsalı F-35 qırıcılarının alınması planını yenidən qiymətləndirmək üzərində işləyir. Kanada 88 ədəd F-35 alınması planına alternativ variantları, o cümlədən İsveçin Saab Gripen təyyarələrini də nəzərdən keçirir.
Kanada ilə ABŞ arasında münasibətlər son aylarda ticarət mübahisələri fonunda gərginləşib. ABŞ avqustda Kanadanın 27,6 milyard Kanada dolları həcmində məhsullarına 50 faizə qədər tarif tətbiq edib. Kanada isə sentyabrın 8-dən ABŞ məhsullarına 15, 25 və 50 faiz dərəcələrində cavab tarifləri tətbiq etməyə başlayıb.