ABŞ Nümayəndələr Palatasında demokratlar spiker Mayk Consonu kənardan keçərək Ukraynaya yardım və Rusiyaya qarşı yeni sanksiyalar paketini səsverməyə çıxarmaq üçün zəruri imzaları toplayıblar.
Redaksiya Axios-a istinadla xəbər verir ki, qanun layihəsi Ukraynaya 1,3 milyard dollar həcmində hərbi və digər yardım ayrılmasını nəzərdə tutur. Bundan əlavə, Kiyevə 8 milyard dollara qədər kredit imkanının yaradılması planlaşdırılır.
Paketdə Rusiyaya qarşı yeni sanksiyaların tətbiqi də yer alır. Məqsəd Moskvanın hərbi imkanlarını və müharibəni maliyyələşdirmə qabiliyyətini daha da məhdudlaşdırmaqdır.
Demokratların bu addımı Nümayəndələr Palatasında Ukrayna yardımının uzun müddət siyasi mübahisə mövzusu olması fonunda atılıb. Spiker Mayk Consonun mövqeyindən asılı olmayaraq sənədin səsverməyə çıxarılması üçün xüsusi prosedurdan istifadə olunur.
Qanun layihəsinin qəbul edilib-edilməyəcəyi hələlik məlum deyil. Lakin imzaların toplanması Ukraynaya yardım və Rusiyaya sanksiyalar məsələsində Konqres daxilində təzyiqin artdığını göstərir.