OpenAI Codex kod agentinin iOS və Android üçün ChatGPT mobil tətbiqində işləməyə başladığını açıqlayıb.
Redaksiya xəbər verir ki, yenilik istifadəçilərə kompüterdə çalışan Codex sessiyalarını telefondan izləmək və idarə etmək imkanı verir. Bunun üçün ChatGPT mobil tətbiqini və macOS üçün Codex tətbiqini yeniləmək lazımdır.
Yeni sistemdə istifadəçi kompüterində çalışan Codex sessiyasına telefondan qoşula bilir. Beləliklə, kod agentinin gördüyü işlər, terminal çıxışları, test nəticələri, diff-lər və təsdiq tələbləri mobil tətbiqdə real vaxtda görünür.
OpenAI bildirir ki, istifadəçi telefondan Codex-ə əlavə tapşırıq verə, icazələri təsdiqləyə, modeli dəyişə, yeni mövzu başlada və ya aktiv işi yönləndirə bilər. Bu, xüsusilə kompüterdən uzaqda olan zaman agentin boş dayanmasının qarşısını almaq üçün nəzərdə tutulub.
Sistem təhlükəsiz relay infrastrukturu üzərindən işləyir. Fayllar, giriş məlumatları və lokal icazələr kompüterdə qalır, telefona isə sessiyanın canlı vəziyyəti və idarəetmə imkanları ötürülür.
OpenAI həmçinin Remote SSH dəstəyinin ümumi istifadəyə verildiyini, Hooks funksiyasının aktiv olduğunu və Enterprise mühitləri üçün əlavə idarəetmə imkanlarının təqdim edildiyini bildirib. Windows-da Codex tətbiqinə telefondan qoşulma dəstəyinin isə daha sonra istifadəyə veriləcəyi açıqlanıb.