Çin Xalq Azadlıq Ordusu canlı atəş təlimi zamanı mobil çoxlüləli aerozol tüstü generatoru sistemini sınaqdan keçirib. Sistem qısa müddətdə geniş ərazini sıx tüstü pərdəsi ilə örtmək üçün nəzərdə tutulub. Bu barədə Çin hərbi mənbələrinə əsaslanan məlumatlarda bildirilir.
Redaksiya istinadla xəbər verir ki, sistemin əsas vəzifəsi döyüş meydanında qoşunların və hərbi texnikanın görünürlüğünü azaltmaqdır. Yaradılan aerozol pərdəsinin adi optik müşahidə vasitələri ilə yanaşı, pilotsuz uçuş aparatlarının kameralarının və termal görüntüləmə sistemlərinin hədəfi müəyyən etməsini çətinləşdirdiyi bildirilir.
Tüstü pərdəsi lazer və digər optik-elektron tuşlama vasitələrinin effektivliyini də azaltmaq məqsədi daşıyır. Bu isə dəqiq idarə olunan bəzi silah sistemlərinin hədəfi aşkarlaması və izləməsini çətinləşdirə bilər.
Sınaq Çin ordusunun müasir döyüş şəraitində PUA-lar, termal kameralar və yüksək dəqiqlikli silahların yaratdığı təhlükələrə qarşı passiv müdafiə vasitələrini inkişaf etdirdiyini göstərir. Mobil platforma sistemin qısa müddətdə müxtəlif mövqelərə yerləşdirilməsinə və ehtiyac yaranan ərazidə geniş tüstü pərdəsi formalaşdırmasına imkan verir.