Elm və texnologiya irəlilədikcə, bağırsaqların orqanizmin ümumi sağlamlığı ilə əlaqəsi haqqında yeni məlumatlar ortaya çıxır. Bu kəşflər qidalanma sahəsindəki tövsiyələrin də təkmilləşdirilməsinə səbəb olur. Mütəxəssislər həftədə 30 müxtəlif meyvə və tərəvəz istehlakını, lif qəbulunun artırılmasını və pəhrizin uzunömürlülüyə təsirini vurğulayırlar. Qidalanma alimi Toral Şahın qeyd etdiyi kimi, bağırsaq mikrobiyomu qidaları parçalayır, qida maddələrini sorur və zərərli patogenlərlə mübarizə aparır. Bu səbəbdən bağırsaq sağlamlığı ruh sağlamlığından tutmuş piylənməyə qədər bir çox sahədə ümumi rifahımız üçün böyük əhəmiyyət kəsb edir.
Redaksiya məlumat verir ki, hər kəsin bağırsaq quruluşu fərqli olduğu üçün qidaların təsiri də fərdidir. Bununla belə, yaxşı bağırsaq sağlamlığı üçün bəzi qidalardan uzaq durmaq və ya onlara üstünlük vermək vacibdir.
Dadlandırıcı qidalar: Süni dadlandırıcılar, dad qatqıları, emulqatorlar və digər qatqı maddələri ilə hazırlanan sosiska, dondurma kimi məhsullar bağırsaq mikrobiyomuna mənfi təsir göstərə bilər. Hətta bu qidalar 32 müxtəlif sağlamlıq problemi ilə əlaqələndirilmişdir. Lakin mütəxəssislər 80/20 qaydasını tətbiq etməyi məsləhət görürlər: 80% sağlam qidalanın, 20% isə özünüzü mükafatlandırın.
Qızardılmış qidalar: Bu cür qidalarda olan doymuş və trans yağlar həzmə çətinlik yarada və bağırsaq mikrobiyomunu poza bilər. Sote üsulu ilə hazırlanan yeməklər yağ istehlakını azaltmağa, həzmi asanlaşdırmağa və bağırsaq bakteriyalarına mənfi təsiri minimuma endirməyə kömək edir. Qızardılmış qidalardan tamamilə imtina etmək mümkün deyilsə, yenə də 80/20 qaydası tətbiq oluna bilər.
Yüksək şəkərli qidalar: Biskvitlər, tortlar və digər şirniyyatlar yüksək miqdarda rafinə şəkər ehtiva edir. Bu, bağırsaqlarda iltihaba səbəb ola və faydalı bakteriyalara zərər verə bilər. Şəkərli qidalar təkcə şirniyyatlarla məhdudlaşmır; meyvə şirələri, yoqurtlar, souslar və hətta salat dressinqlərində də gizli şəkər ola bilər. İngiltərə Milli Səhiyyə Xidməti (NHS) yetkinlik yaşına çatmış şəxslərə gündəlik 30 qramdan (təxminən yeddi şəkər kubu) artıq şəkər yeməyi tövsiyə edir.
Alkoqol: Qidalanma mütəxəssisi Rohini Bajekal bildirir ki, alkoqol bağırsaq sağlamlığı üçün ən zərərli həyat tərzi seçimlərindən biridir. Alkoqol faydalı və zərərli bakteriyaların balansını poza bilər, mədə astarındakı hüceyrələri qıcıqlandıraraq xroniki iltihaba yol aça bilər. Həftədə 14 vahiddən çox alkoqol qəbulu isə köp, qəbizlik və narahatlıq kimi problemlərə səbəb ola bilər. Bir vahid yarım stəkan pivə, 25 ml güclü içki və ya kiçik stəkan şərab (125 ml) kimi hesab olunur.