ABŞ son həftələrdə Səudiyyə Ərəbistanı və Qətərə iki əlavə Patriot hava və raketdən müdafiə batareyası yerləşdirib. Məqsəd İranla mümkün yeni genişmiqyaslı qarşıdurma halında Körfəz regionundakı mühüm neft və qaz obyektlərinin müdafiəsini gücləndirməkdir. Bu barədə Axios ABŞ rəsmiləri və regional mənbəyə istinadla məlumat yayıb.
Redaksiya istinadla xəbər verir ki, batareyalardan biri Səudiyyə Ərəbistanında əsas neft obyektlərindən birinin, digəri isə Qətərdə mühüm qaz infrastrukturunun müdafiəsi üçün yerləşdirilib. Vaşinqton bu addımla regiondakı müttəfiqlərini mümkün İran cavab zərbələrindən qorumağa çalışır.
Məlumata görə, Səudiyyə Ərəbistanı və Qətər rəhbərləri daha əvvəl ABŞ Prezidenti Donald Trampı İranın enerji infrastrukturuna zərbələr endirməkdən çəkindirməyə çalışıblar. Riyad və Doha belə bir hücumun İran tərəfindən onların neft və qaz obyektlərinə cavab zərbələri ilə nəticələnə biləcəyindən narahat olduqlarını bildiriblər.
Patriot sistemlərinin əlavə yerləşdirilməsi ABŞ-ın Yaxın Şərqdə hərbi mövcudluğunu genişləndirdiyi bir vaxta təsadüf edir. Vaşinqton regiona əlavə hərbi gəmilər, təyyarələr və şəxsi heyət göndərir və İranla danışıqların uğursuz olacağı halda yeni hərbi əməliyyatların mümkünlüyünü açıq saxlayır.
Patriot sistemləri ballistik və qanadlı raketlərin, eləcə də bəzi pilotsuz uçuş aparatlarının vurulması üçün nəzərdə tutulub. İranla davam edən qarşıdurma fonunda bu sistemlərə və onların tutucu raketlərinə tələbatın əhəmiyyətli dərəcədə artdığı bildirilir.