1970-ci illərin əfsanəvi musiqi qrupu ABBA-nın şöhrət zirvəsinə yüksəlişi və dünya şöhrəti qazanması barədə yeni sənədli film çəkilib. "ABBA: Against The Odds" adlı film, qrupun Eurovision mahnı müsabiqəsindəki qələbəsindən sonra qlobal pop musiqi səhnəsindəki uğurlarına fokuslanır.
Redaksiya məlumat verir ki, BBC tərəfindən hazırlanan sənədli film, İsveçin 1974-cü ildə ABBA-nı dünyaya təqdim etməsindən başlayaraq, qrupun "Waterloo" mahnısı ilə Eurovision-da qələbə qazanması və sonrakı illərdəki uğurlarına işıq salır. Film, qrupun üzvləri Aqneta Feltskoq, Byorn Ulveus, Anni-Frid Linqstad və Benni Anderssonun şəxsi həyatları və yaradıcılıq prosesləri ilə bağlı arxiv materiallarından istifadə edir.
Sənədli filmdə, ABBA-nın musiqisinin dünya miqyasında qəbul olunması, xüsusilə də Amerika bazarına çıxışı ətraflı təhlil edilir. Qrupun "Gimme Gimme Gimme (A Man After Midnight)" kimi hit mahnılarının, diskotekaya qarşı çıxan ABŞ-da necə qarşılandığına diqqət yetirilir. Eyni zamanda, qrupun daxili dinamikası, üzvlər arasındakı münasibətlər və şəxsi həyatlarındakı dəyişikliklər də araşdırılır.
Film, ABBA-nın 1979-cu ildə Uembli Arenada verdiyi konsertlərdən görüntülərlə tamamlanır. Bu konsertlər, qrupun karyerasının zirvəsi kimi qiymətləndirilir. Sənədli film, ABBA-nın musiqisinin populyarlığının davam etdiyini və onların mirasının hələ də yaşadığını vurğulayır.
Sevinc Kərimova