Türkiyənin xarici işlər naziri Hakan Fidan Məkkə Birgə Müdafiə Sazişinə üzv ölkələrin xarici işlər nazirlərinin Nyu-Yorkda görüş keçirdiyini bildirib. Onun sözlərinə görə, Pakistan alyansın baş katibi vəzifəsinə namizəd irəli sürüb və həmin namizədin qəbul edilərək yaxın zamanda fəaliyyətə başlaması yüksək ehtimal olunur. Bu barədə Türkiyə mediası məlumat yayıb.
Redaksiya istinadla xəbər verir ki, Fidan görüş zamanı Səudiyyə Ərəbistanının üzləşdiyi təhlükəsizlik risklərinin də qiymətləndirildiyini bildirib. O, ölkənin cənubdan husilərin hücumları, digər istiqamətlərdən isə müxtəlif hərbi təhdidlərlə qarşılaşdığını qeyd edib.
Fidanın sözlərinə görə, üç ölkə Məkkə Birgə Müdafiə Sazişinin bu təhlükələr qarşısında hazırlıq səviyyəsini və Səudiyyə Ərəbistanına hansı formada dəstək göstərilə biləcəyini müzakirə edib. Türkiyə, Pakistan və Səudiyyə Ərəbistanı daha əvvəl alyansın baş qərargahının və daimi strukturlarının yaradılması istiqamətində işlərə başlayıblar.
Türkiyənin xarici işlər naziri ölkəsinin Silahlı Qüvvələrinin yüksək peşəkarlığa malik olduğunu da vurğulayıb. O, Türkiyə ordusunun mümkün təhdidlərə cavab vermək üçün kifayət qədər imkan, təcrübə və hazırlığa sahib olduğunu bildirib.