ABŞ Prezidenti Donald Tramp NATO ilə bağlı sərt və tənqidi ritorikasını davam etdirsə də, onun administrasiyası alyans daxilində hərbi və infrastruktur yatırımlarını davam etdirir. Vaşinqton NATO-nu ABŞ-ın qlobal hərbi imkanlarını genişləndirmək üçün mühüm platforma kimi istifadə etməyə davam edir. Bu barədə Reuters agentliyi məlumat yayıb.
Redaksiya istinadla xəbər verir ki, ABŞ administrasiyası Avropadakı hərbi mövcudluğun mümkün azaldılmasını nəzərdən keçirsə də, eyni zamanda NATO-nun kritik infrastrukturuna və strateji bazalarına sərmayə yatırır. Bunlardan biri Rumıniyadakı Mihail Koqelniçanu aviabazasıdır və həmin obyekt ABŞ və NATO qüvvələrinin regiondakı fəaliyyətində mühüm rol oynayır.
Reuters-in məlumatına görə, Tramp administrasiyası Avropa müttəfiqlərindən müdafiə xərclərini artırmağı tələb etməklə yanaşı, NATO-nun ABŞ qüvvələrinin Avropa, Yaxın Şərq və digər regionlarda yerləşdirilməsi üçün yaratdığı imkanlardan da faydalanır.
Bununla belə, Trampın NATO müttəfiqlərinə qarşı sərt bəyanatları alyans daxilində ABŞ-ın uzunmüddətli öhdəlikləri ilə bağlı qeyri-müəyyənliyi artırıb. Bir sıra Avropa ölkələri buna cavab olaraq müdafiə qabiliyyətlərini gücləndirməyə və ABŞ-dan asılılığı azaltmağa çalışırlar.