Anthropic şirkəti yeni flaqman süni intellekt modeli Claude Opus 5.5-i təqdim edib. Model proqramlaşdırma, kompüterdən istifadə və peşəkar bilik tələb edən tapşırıqlarda ciddi irəliləyiş göstərir və Claude Fable 5.1 səviyyəsində performans təqdim edir. Bu barədə Anthropic şirkəti məlumat yayıb.
Redaksiya istinadla xəbər verir ki, Claude Opus 5.5 əvvəlki Opus 5-dən daha az hesablama resursu tələb edir. Modelin giriş qiyməti hər milyon token üçün 4 dollar, çıxış qiyməti isə 20 dollar müəyyən edilib. Keşdən oxuma qiyməti hər milyon token üçün 20 sentə endirilib. Anthropic bildirir ki, tipik tapşırıqlarda ümumi xərc Opus 5-lə müqayisədə təxminən 40 faiz aşağıdır, generasiya sürəti isə 30 faizdən çox artıb.
Şirkətin testlərində Opus 5.5 Terminal-Bench 4.0-da 66,4 faiz, FrontierCode v1.1-də 54,4 faiz, Humanity's Last Exam testində alətlərlə 67,7 faiz nəticə göstərib. Anthropic-in təqdim etdiyi müqayisələrdə model bəzi proqramlaşdırma və bilik tapşırıqlarında GPT-6 Astra və Fable 5.1-i qabaqlasa da, bütün testlərdə lider olmayıb.
Opus 5.5 uzunmüddətli agent tapşırıqları, böyük kod bazaları, sənədlərlə iş və kompüter idarəetməsi üçün təkmilləşdirilib. Erkən sınaqlardan birində model 680 min sətirlik kod miqrasiyasını bir gündən az müddətdə tamamlayıb. Anthropic-in daxili sınağında isə HAProxy proqramının C dilindən Rust dilinə köçürülməsi 9,5 saata başa çatıb.
Şirkət modelin prompt injection hücumlarına qarşı müqavimətinin də artırıldığını bildirib. Biologiya və kibertəhlükəsizlik kimi həssas sahələrdə əlavə təhlükəsizlik mexanizmləri tətbiq olunur. Claude Pro, Max və Team istifadəçilərinin beş saatlıq istifadə limitləri artırılıb və saxlanılaraq daha sonra istifadə edilə bilən limit sıfırlaması təqdim olunub.
Anthropic həmçinin Claude Sonnet 5.5 və Claude Haiku 5.5 modellərinin yaxın həftələrdə təqdim ediləcəyini açıqlayıb.