Avropa Komissiyası, sosial media platformu Snapchat-in Rəqəmsal Xidmətlər Qanununa (DSA) uyğun fəaliyyət göstərib-göstərmədiyini müəyyən etmək məqsədilə araşdırma başlatdığını elan edib. Bu qərar, platformanın uşaqları zərərli məzmunlara, cinayət fəaliyyətlərinə və qanunsuz məhsul satışlarına məruz qoymuş ola biləcəyi şübhələri əsasında verilib.
Redaksiya məlumat verir ki, aparılan araşdırma bir sıra səbəbləri əhatə edir. Bunlar arasında yaşın təsdiqlənməsi, uşaqların istismara məruz qalması və cinayət fəaliyyətlərinə yönləndirilməsi kimi məsələlər yer alır. Komissiyanın açıqlamasında qeyd olunur ki, Snapchat-in standart parametrləri uşaqlar üçün kifayət qədər gizlilik, təhlükəsizlik və qoruma təmin etmir.
Avropa İttifaqının texnologiya qaydaları çərçivəsində, Avropada fəaliyyət göstərən böyük rəqəmsal platformalar müəyyən edilmiş qanunlara riayət etməlidirlər. Qaydaları pozan rəqəmsal platformalara Avropa Komissiyası tərəfindən ciddi maliyyə cəzaları tətbiq oluna bilər. Həmçinin, pozuntuların təkrarlanması halında, həmin rəqəmsal platformaların Avropa İttifaqı ərazisindəki fəaliyyətinə xitam verilə bilər.