Rusiya Təhlükəsizlik Şurası sədrinin müavini Dmitri Medvedev X sosial şəbəkəsində fəaliyyətini niyə davam etdirdiyini açıqlayıb. O bildirib ki, platformada qalmasının əsas səbəbi Qərb ölkələrinin, xüsusilə Avropa xalqlarına alternativ məlumat çatdırmaq istəyidir.
Redaksiya xəbər verir ki, Medvedev ondan tez-tez niyə X, əvvəlki adı ilə Twitter platformasını tərk etmədiyinin soruşulduğunu deyib. O, buna cavab olaraq, "Əgər mən getsəm, Qərb ölkələrinin və Avropa xalqlarına həqiqəti kim deyəcək?" fikrini səsləndirib.
Medvedevin sözlərinə görə, sosial şəbəkələr vasitəsilə Qərb auditoriyası heç olmasa məhdud həcmdə fərqli məlumat əldə edə bilir. O, bu imkanın məhdud olsa da, mühüm olduğunu vurğulayıb.
Rusiya rəsmisi son illərdə X platformasından xarici siyasət, Ukrayna müharibəsi və Rusiya-Qərb münasibətləri ilə bağlı sərt açıqlamalar vermək üçün fəal istifadə edir. Onun paylaşımları tez-tez Avropa və ABŞ siyasətinə yönəlmiş tənqidlər və Moskvanın mövqeyinin təqdimatı ilə müşayiət olunur.
Medvedevin "həqiqət" kimi təqdim etdiyi məlumatlar onun və Rusiya hakimiyyətinin siyasi mövqeyini əks etdirir və Qərb hökumətləri ilə media qurumları bir sıra məsələlərdə bu yanaşmalarla razılaşmırlar.