İşə qəbul prosesində süni intellektdən istifadə genişlənsə də, namizədlərin bir hissəsi robot və ya süni intellekt avatarı ilə keçirilən müsahibələrə mənfi yanaşır. Bu isə şirkətlərin potensial əməkdaşları hələ işə qəbul mərhələsində itirməsinə səbəb ola bilər.
Bu barədə Robin D. Şulmanın müəllifi olduğu məqalədə bildirilir.
“Greenhouse”un məlumatına əsasən, ABŞ-da namizədlərin 38%-i işə qəbul prosesində süni intellektlə müsahibənin olması səbəbindən prosesdən imtina etdiyini bildirib. Respondentlərin yalnız 12%-i belə müsahibə məcburi olacağı halda onu keçməyə hazır olduğunu qeyd edib.
Məqalədə bildirilir ki, süni intellekt vasitəsilə aparılan müsahibələr işə qəbul prosesində insan ünsiyyətini azalda və namizədin şirkət haqqında təsəvvürünə təsir göstərə bilər. Belə müsahibələr zamanı namizədlərdə narahatlıq, özünəinamın azalması, zehni yorğunluq və məyusluq yarana biləcəyi qeyd olunur.
İnsanla və süni intellektlə müsahibənin fərqi
Müəllifin fikrincə, insanla aparılan müsahibədə namizəd qarşı tərəfin reaksiyalarını müşahidə edir, suallarına cavab alır və şirkətin onun üçün uyğun olub-olmadığını müəyyənləşdirməyə çalışır.
Süni intellektlə müsahibədə isə bu qarşılıqlı əlaqənin mühüm hissəsi itə bilər. Namizəd sualı dinləyir, cavab verir, lakin qarşı tərəfdən təbii reaksiya və emosional geribildirim almır.
Məqalədə 2007-ci ildə “Philosophical Transactions of the Royal Society B: Biological Sciences” jurnalında dərc olunmuş araşdırmaya da istinad edilir. Bildirilir ki, insan beyni üz ifadələri, baxışlar, səs, bədən hərəkətləri və digər sosial siqnalları emal edən sistemlərə malikdir. Xüsusilə amiqdala üz ifadələri, baxış və etibarlılıqla əlaqəli sosial məlumatların emalında rol oynayır.
Süni intellektlə müsahibə zamanı isə namizəd üz ifadələri, emosional reaksiyalar və təbii dialoq kimi siqnallardan məhrum ola bilər. Bu da onun həm öz performansını, həm də müsahibəni keçirən şirkəti necə qiymətləndirməsinə təsir göstərə bilər.
Müəllif qeyd edir ki, belə müsahibələr namizəddə prosesin şəxsi ünsiyyətdən daha çox “əməliyyat xarakterli” olduğu təəssüratını yarada bilər. Namizəd sualları cavablandırsa da, qarşı tərəfdən təbii reaksiya olmadığı üçün ünsiyyət birtərəfli və mexaniki görünə bilər.
Məqalədə vurğulanır ki, şirkətlər işə qəbul prosesində süni intellektdən istifadə edərkən namizəd təcrübəsini də nəzərə almalıdırlar. Əks halda, texnologiya işə qəbulu sürətləndirsə belə, bəzi namizədlərin prosesdən çəkilməsinə səbəb ola bilər.
Valyuta.az