Çin Xalq Azadlıq Ordusunun yüksək rütbəli nümayəndələrindən biri, Çin lideri Si Cinpinin yaxın silahdaşı kimi tanınan general Çjan Yusya ABŞ-yə nüvə sirlərini ötürmək və korrupsiya əməllərində iştirak etməkdə ittiham olunur. İddialar Çində hərbi-siyasi dairələrdə ciddi rezonans doğurub və ölkənin təhlükəsizlik sisteminə təsirləri baxımından geniş müzakirələrə səbəb olub.
Redaksiya The Wall Street Journal-a istinadla xəbər verir ki, general Çjan Yusyanın Si Cinpinin nüfuzuna xələl gətirməkdə və Çin Xalq Azadlıq Ordusunun döyüş qabiliyyətinə zərər vurmaqda günahlandırılması ilə yanaşı, onun bir sıra yüksək vəzifəli hərbçilərə təqdim edilən məxfi brifinqlərdə ağır korrupsiya ittihamları ilə üzləşdiyi bildirilib. Məlumata görə, Çjan Yusya general Li Şanfunun Çin Xalq Respublikasının müdafiə naziri vəzifəsinə irəli çəkilməsi üçün rüşvət alıb.
Nəşrin məlumatında qeyd olunur ki, ittihamların ən ciddi hissəsi Çjan Yusyanın ABŞ-yə Çinin nüvə proqramı ilə bağlı məlumatlar ötürməsi iddiasıdır. Bu iddialar təsdiqlənərsə, Çin üçün milli təhlükəsizlik səviyyəsində son dərəcə ağır nəticələr doğura bilər və beynəlxalq münasibətlərdə yeni gərginlik mərhələsi yarada bilər.
The Wall Street Journal yazır ki, baş verənlərin fonunda Çində hərbi aparat daxilində genişmiqyaslı siyasi təmizləmələr başlayıb. Məlumata görə, proses yalnız bir neçə şəxsə deyil, silahlı qüvvələrin müxtəlif pillələrindəki rəhbər heyətə də şamil olunur və hakimiyyət daxilində loyallığın yenidən yoxlanılması məqsədi daşıyır. Bu addımlar Pekinin orduda nəzarəti sərtləşdirmək və potensial təhlükələri aradan qaldırmaq niyyətindən xəbər verir.