Qəzza zolağında atəşkəs razılaşmasına baxmayaraq, İsrail ordusunun hərbi əməliyyatları davam edir. 2023-cü il oktyabrın 7-dən bəri bölgədə həlak olanların sayı 74 min 377 nəfərə, yaralananların sayı isə 175 min 398 nəfərə çatıb. Bu barədə Qəzzanın Səhiyyə Nazirliyi oktyabrın 11-də məlumat yayıb.
Redaksiya mənbəyə istinadən xəbər verir ki, 2025-ci il oktyabrın 11-də qüvvəyə minmiş atəşkəs razılaşmasından sonra Qəzzada 1488 nəfər həyatını itirib, 5281 nəfər yaralanıb. Bundan əlavə, dağıntılar altından 836 nəfərin meyiti çıxarılıb. Son sutka ərzində isə xəstəxanalara 7 nəfərin meyiti və 28 yaralı gətirilib.
Qəzzada davam edən hərbi əməliyyatlara etiraz olaraq dünyanın müxtəlif ölkələrində Fələstinə dəstək nümayişləri təşkil olunub. ABŞ-nin Los-Anceles şəhərində hüquq müdafiəçiləri küçələrə çıxaraq Qəzzada mülki əhalinin müdafiəsinə çağırıblar. Aksiya iştirakçıları “Qəzzanı unutmayın!” şüarı ilə beynəlxalq ictimaiyyətin diqqətini bölgədəki humanitar vəziyyətə yönəltməyə çalışıblar.
Almaniyanın paytaxtı Berlində də Fələstinə dəstək nümayişi keçirilib. Etirazçılar Almaniya hökumətindən İsrailə silah satışını və hərbi avadanlıq tədarükünü dayandırmağı tələb ediblər. Nümayiş zamanı “İsrailə silah göndərilməsini dayandırın!” şüarları səsləndirilib.
İtaliyada isə oktyabrın 10-da 50-dən çox şəhərdə Fələstinə dəstək aksiyaları təşkil olunub. ANSA agentliyinin məlumatına görə, Roma, Milan, Turin və Neapol da daxil olmaqla müxtəlif şəhərlərdə minlərlə insan küçələrə çıxıb. Nümayişçilər İsrailin Qəzzada həyata keçirdiyi hərbi əməliyyatların dayandırılmasını və humanitar yardımların bölgəyə maneəsiz çatdırılmasını tələb ediblər.
Romada keçirilən yürüşdə nümayişçilər “Soyqırımın sona çatması sionizmin sona çatması deməkdir” yazılmış pankart qaldırıblar. Aksiya iştirakçıları Fələstin xalqının hüquqlarının qorunmasını və İsrailə qarşı beynəlxalq təzyiqlərin artırılmasını istəyiblər.
Qeyd edək ki, 2025-ci ilin oktyabrında ABŞ-nin vasitəçiliyi ilə əldə olunan atəşkəs razılaşması Qəzzada genişmiqyaslı hərbi əməliyyatların dayandırılmasını nəzərdə tutsa da, bölgədə qarşıdurmalar tam başa çatmayıb. İsrail tərəfi hərbi əməliyyatlarının təhlükəsizlik təhdidlərinə və silahlı qruplaşmalara qarşı yönəldiyini bildirir. Qəzzanın səhiyyə orqanları isə hücumlar nəticəsində mülki əhali arasında itkilərin davam etdiyini açıqlayır.