Palantir şirkətinin baş icraçı direktoru Aleks Karp Almaniyanın müdafiə siyasətini və Bundesverin şirkətin proqram təminatını inteqrasiya etməməsini sərt tənqid edib.
Redaksiya Welt-ə istinadla xəbər verir ki, Karp Almaniyada Palantir ətrafında aparılan müzakirələri “cadugərlik barədə danışığa” bənzədib. O bildirib ki, Berlin real döyüş şəraitində sınaqdan keçmiş texnologiyalara daha praqmatik yanaşmalıdır.
Palantir rəhbəri Avropanı siyasi baxımdan üstün tutulan alternativlər əvəzinə Ukraynada müharibə şəraitində yoxlanılmış müdafiə texnologiyalarını almağa çağırıb. Onun sözlərinə görə, Avropa özünü müdafiə etmək üçün hansı məhsullara üstünlük verəcəyinə qərar verməlidir.
Karp bu seçimi belə təsvir edib: Avropa “PowerPoint təqdimatlarında sınaqdan keçirilmiş məhsulları”, yoxsa “böyük hərbi gücün qarşısını faktiki olaraq saxlamış məhsulları” alacaq?
Onun açıqlaması Almaniyada müdafiə texnologiyalarının modernləşdirilməsi, süni intellekt əsaslı hərbi proqramlar və Ukrayna müharibəsindən çıxarılan praktiki nəticələr fonunda gündəmə gəlib.