Fransada prezidentliyə namizəd Jan-Lük Melenşon Almaniyanın Avropanın ən böyük ənənəvi ordusunu yaratmaq planına qarşı çıxdığını bildirib. O, belə bir qərarın Fransa və digər Avropa ölkələri ilə müzakirə edilməsinin vacibliyini vurğulayıb. Bu barədə Fransa və Avropa mediası məlumat yayıb.
Redaksiya istinadla xəbər verir ki, Melenşon Almaniyanın təkbaşına Avropanın ən böyük ənənəvi ordusunu yaratmaq qərarı verməsinin qəbuledilməz olduğunu deyib. O, Berlinin bu planı həyata keçirməkdə israrlı olacağı təqdirdə, bunun səbəblərini tərəfdaşlarına izah etməli olduğunu bildirib.
Melenşon Almaniyanın yaradacağı böyük ordunun hansı məqsədlə istifadə ediləcəyinə dair sual qaldırıb. O, bu qüvvələrin Fransaya qarşı nəzərdə tutulmadığına ümid etdiyini bildirərək, əsas sualın belə bir hərbi gücün konkret olaraq hansı təhlükəyə qarşı yaradılması olduğunu deyib.
Melenşon daha əvvəl də Avropada sürətli silahlanmanı tənqid edib və Almaniyanın Avropanın ən böyük ənənəvi ordusunu yaratmaq layihəsinin Fransa üçün qəbuledilməz olduğunu bildirmişdi. Almaniya hökuməti isə müdafiə xərclərinin artırılmasını Rusiyadan qaynaqlanan təhlükələr və Avropanın öz təhlükəsizliyinə daha çox məsuliyyət daşıması zərurəti ilə əsaslandırır.