Kanye Uestin Sankt-Peterburqda keçirilməsi planlaşdırılan oktyabr konsertləri ilə bağlı qeyri-müəyyənlik fonunda Rusiya İstehlakçılar İttifaqı konsert biletlərinin satışı qaydalarına yenidən baxılmasını təklif edib.
Redaksiya xəbər verir ki, təşəbbüs Rusiyanın Mədəniyyət Nazirliyinə, Federasiya Şurasının Elm, Təhsil və Mədəniyyət Komitəsinə, eləcə də Dövlət Dumasının Mədəniyyət Komitəsinə göndərilib.
Təklifə əsasən, konsert təşkilatçıları bilet satışına başlamazdan əvvəl tədbirin keçiriləcəyi məkanla rəsmi müqavilə bağlamalı və sənətçi ilə əldə edilən razılaşmaları təsdiqləməli ola bilərlər.
Təşəbbüs müəllifləri həmçinin endirim və kampaniya adı altında geri qaytarılması mümkün olmayan biletlərin satışından imtina edilməsini tövsiyə edirlər.
Müzakirələr Kanye Uestin Rusiyada keçirilməsi nəzərdə tutulan konsertlərinin statusu ilə bağlı yaranmış qeyri-müəyyənlikdən sonra aktuallaşıb.