İsraildə parlament seçkilərində bütün səslərin hesablanması başa çatıb. Nəticələrə əsasən, Baş nazir Benyamin Netanyahunun rəhbərlik etdiyi siyasi blok 53, Qadi Ayzenkotun rəhbərlik etdiyi müxalifət bloku 48, ərəb partiyaları isə 19 deputat mandatı qazanıb. Heç bir siyasi blok hökumət qurmaq üçün tələb olunan parlament çoxluğunu əldə edə bilməyib. Bu barədə “The Times of Israel” nəşri məlumat yayıb.
Redaksiya mənbəyə istinadən xəbər verir ki, İsrailin 120 yerlik parlamenti — Knessetdə hökumətin formalaşdırılması üçün ən azı 61 deputatın dəstəyi tələb olunur. Netanyahu bloku bu həddə çatmaq üçün əlavə 8, Ayzenkotun rəhbərlik etdiyi blok isə 13 mandata ehtiyac duyur.
Mərkəzi Seçki Komissiyasının açıqladığı nəticələrə görə, Netanyahunun rəhbərlik etdiyi “Likud” partiyası 27 mandatla parlamentdə ən böyük siyasi qüvvə olub. Ayzenkotun “Yaşar” partiyası isə 21 mandat əldə edib.
Digər partiyaların nəticələrinə əsasən, Naftali Bennettin “Beyaxad” partiyası 12, “Birgə Siyahı” 11, “Demokratlar” və “Raam” partiyalarının hər biri 8 mandat qazanıb.
Aviqdor Libermanın “İsrail Beytenu”, “Birləşmiş Tövrat Yəhudiliyi” və “Otsma Yehudit” partiyalarının hər biri 7, “Şas” və “Dini Sionizm” partiyaları isə hər biri 6 deputatla təmsil olunacaq.
Seçkilərin diqqətçəkən nəticələrindən biri ərəb partiyalarının parlamentdəki təmsilçiliyinin əhəmiyyətli dərəcədə artmasıdır. “Birgə Siyahı” və “Raam” birlikdə 19 mandat əldə edərək rekord göstəriciyə nail olublar.
Beləliklə, ərəb partiyalarının mövqeyi yeni hökumətin formalaşdırılması prosesində mühüm əhəmiyyət kəsb edə bilər. Lakin müxalifət daxilində həmin partiyalarla əməkdaşlıq məsələsində ciddi fikir ayrılıqları mövcuddur.
Netanyahunun siyasi bloku əvvəlki parlamentdə malik olduğu 68 mandatdan 53 mandata geriləyib. Bu isə hazırkı hakim koalisiyanın parlament çoxluğunu itirməsi deməkdir.
Seçici fəallığı 77,9 faiz təşkil edib. Ümumilikdə 5 milyon 716 min 665 seçici səsvermədə iştirak edib.
Mərkəzi Seçki Komissiyasının açıqladığı nəticələrin noyabrın 4-də Prezident İshaq Hersoqa təqdim edilməsi nəzərdə tutulur. Bundan sonra dövlət başçısı siyasi partiyalarla məsləhətləşmələr apararaq hökuməti formalaşdırmaq vəzifəsini namizədlərdən birinə həvalə edəcək.
Yeni Knessetin noyabrın 10-da fəaliyyətə başlaması gözlənilir.
Seçkilərin nəticələri İsraildə koalisiya danışıqlarının mürəkkəb keçəcəyini göstərir. Yeni hökumətin formalaşdırılması üçün siyasi qüvvələr arasında əlavə razılaşmaların əldə edilməsi tələb olunur.