İran hakimiyyəti ölkə vətəndaşlarını sabah saat 14:00-da keçiriləcək kütləvi nümayişə qatılmağa çağırıb. Rəsmi açıqlamalara görə, aksiyanın məqsədi ali dini lider Ayətullah Əli Xameneiyə dəstəyin nümayiş etdirilməsidir.
Redaksiya xəbər verir ki, hakimiyyət orqanları mitinq iştirakçılarından əllərində Qurani-Kərimlə aksiyaya gəlmələrini xahiş edib. Bu çağırışın səbəbi kimi, şah tərəfdarı qruplar tərəfindən müqəddəs dini kitabın təhqir edildiyi iddiaları göstərilib.
Məlumata görə, rəsmi dairələr baş verənləri dini dəyərlərə qarşı təxribat kimi qiymətləndirir və ictimai birliyin nümayiş etdirilməsinin vacibliyini vurğulayır. Hakimiyyət tərəfdarları aksiyanın ölkədə sabitliyin qorunmasına xidmət edəcəyini bildirirlər.
Qeyd edək ki, son günlər İranda etirazlar və qarşılıqlı ittihamlar fonunda siyasi və ictimai gərginlik artmaqdadır. Analitiklər sabahkı mitinqin ölkədaxili proseslərə təsir göstərə biləcəyini istisna etmirlər.