Qətərdə keçirilən Formula 1 Qran Prisi mövsümün gərgin çempionluq mübarizəsini Əbu-Dabi mərhələsinə daşıdı və nəticələr liderlik fərqini minimum həddə endirdi.
Redaksiya BBC-yə istinadən xəbər verir ki, Red Bull sürücüsü Maks Verstappen yarışın əvvəlində təhlükəsizlik maşınının trasda olduğu an "McLaren" komandası tərəfindən verilən qeyri-adi strategiya qərarından faydalanaraq liderliyi ələ keçirib. Bu qərar nəticəsində Oskar Piastrinin mümkün qələbəsi əldən çıxıb.
Verstappen mövsümdə yeddinci qələbəsini qazanaraq həm Lando Norrisə, həm də Piastriyə çatan nəticə göstərib. Piastri ikinci, "Williams" komandasının sürücüsü Karlos Sains isə McLaren strategiyasının təsiri ilə gözlənilmədən üçüncü yeri tutub.
Lando Norris yarışın son döngələrində Kimi Antonellinin Mercedesini keçərək iki əlavə xal əldə edib və ümumi hesabda Verstappen üzərində 12 xallıq üstünlüyünü qoruyub. Verstappen isə xal cədvəlində Piastrini dörd xal qabaqlayaraq ikinci pilləyə yüksəlib.
Əbu-Dabidə 5–7 dekabr tarixlərində keçiriləcək son mərhələdə çempionluq taleyi müəyyənləşəcək. Verstappen qələbə qazandığı halda, Norris titulu təmin etmək üçün ən azı üçüncü yeri tutmalıdır.