Danimarkanın baş naziri Mette Frederiksen çıxışı zamanı böyük texnologiya şirkətlərini uşaqların rifahına ciddi zərər vurmaqda ittiham edib. O bildirib ki, bu şirkətlər uşaqların uşaqlığını “oğurlayaraq” onların üzərindən milyonlarla, hətta milyardlarla gəlir əldə ediblər.
Redaksiya xəbər verir ki, baş nazir texnologiya nəhənglərinin artıq məsuliyyətdən yayınmamalı olduqlarını vurğulayıb. Onun sözlərinə görə, bu şirkətlər qazandıqları böyük sərvət qarşılığında cəmiyyətə, xüsusilə də uşaqların gələcəyinə borcludurlar.
Mette Frederiksen qeyd edib ki, texnologiya nəhənglərinin ödəyəcəyi bu “borc” təkcə Danimarkada deyil, ümumilikdə Avropada rifahın artırılmasına yönəldilməlidir. O əlavə edib ki, əldə olunacaq vəsait sosial inkişaf, təhsil və uşaqların qorunmasına sərmayə kimi istifadə edilməlidir.
Danimarka hökumətinin rəhbəri Avropa ölkələrini bu məsələdə birgə mövqe sərgiləməyə çağıraraq, rəqəmsal nəhənglərin fəaliyyətinə qarşı daha sərt və ədalətli mexanizmlərin formalaşdırılmasının vacibliyini diqqətə çatdırıb.