Almaniyanın xarici işlər naziri Yohann Vadeful Rusiyanın Bonndakı konsulluğunun və Berlindəki Rus Evinin sentyabrın 18-dək bağlanacağını açıqlayıb. Qərar Leypsiqdə pilotsuz uçuş aparatları ilə bağlı insidentlərdən sonra qəbul edilib.
Redaksiya xəbər verir ki, Vadeful Almaniyanın Avropa İttifaqı çərçivəsində Rusiya vətəndaşlarına qarşı sanksiya siyahısının genişləndirilməsini də təşviq edəcəyini bildirib.
Almaniyanın daxili işlər naziri Aleksandr Dobrindt isə ölkənin və Avropa tərəfdaşlarının xüsusi xidmət orqanlarının araşdırmalarının Rusiyanın planlaşdırılmış və həyata keçirilmiş hibrid əməliyyatlarda iştirakı ehtimalını göstərdiyini deyib.
Almaniya mediasının məlumatına görə, avqustun əvvəlində Leypsiq hava limanında Ukraynaya məxsus yük təyyarəsinin yaxınlığında partlayıcı ilə təchiz edilmiş dron aşkarlanıb. Daha sonra ikinci dronun Ukrayna yük təyyarəsinə çırpıldığı, üçüncü pilotsuz aparatın isə avqustun 25-də tapıldığı bildirilir. Hadisələrin arxasında kimin dayandığına dair araşdırmaların davam etdiyi, əvvəllər Kiyev izinin də nəzərdən keçirildiyi qeyd olunub.
Rusiya Xarici İşlər Nazirliyinin sözçüsü Mariya Zaxarova isə Almaniyanın qərarını “uydurulmuş bəhanə ilə eskalasiya” adlandırıb və Berlinin Rusiyanın məsuliyyətinə dair inandırıcı sübut təqdim etmədiyini bildirib.
Zaxarova Rusiyanın konsulluq və Rus Evinin bağlanmasına cavabsız qalmayacağını vurğulayaraq Almaniyanın “layiqli cavab alacağını” deyib.