Avropa İttifaqı Ukrayna, Moldova, Monteneqro və Albaniyanın üzvlük prosesini sürətləndirmək üçün hər ölkə üzrə ayrıca yol xəritələri hazırlayır. Sənədlərdə namizəd dövlətlərdən gözlənilən islahatlar və danışıqlar klasterlərinin tamamlanması üçün konkret müddətlər göstəriləcək. Bu barədə Politico məlumat yayıb.
Redaksiya istinadla xəbər verir ki, sözügedən dörd ölkə Brüssel tərəfindən hazırda Aİ-yə üzvlüyə ən yaxın namizədlər sırasında qiymətləndirilir. Yol xəritələri onların hansı hüquqi, institusional və iqtisadi öhdəlikləri hansı ardıcıllıqla yerinə yetirməli olduğunu daha detallı şəkildə müəyyən edəcək.
Yeni mexanizm yalnız namizəd ölkələr üçün deyil, Aİ-nin mövcud üzvləri üçün də müəyyən öhdəliklər nəzərdə tutur. Çünki danışıqların müxtəlif mərhələlərinin açılması, bağlanması və yekunda yeni üzvün qəbul edilməsi üçün üzv dövlətlərin razılığı tələb olunur.
Ukrayna və Moldova 23 iyun 2022-ci ildə Aİ-yə namizəd statusu alıblar. Bu qərar siyasi və geosiyasi əhəmiyyət daşısa da, üzvlük prosesi avtomatik xarakter daşımır və hər ölkənin Kopenhagen meyarlarına, Aİ qanunvericiliyinə və konkret islahat tələblərinə uyğunlaşmasından asılıdır.
Ukrayna və Moldova ilə rəsmi üzvlük danışıqları 2024-cü ildə başlayıb, 2026-cı ilin iyununda isə ilk danışıqlar klasteri açılıb. Monteneqro və Albaniya da danışıqlarda irəliləmiş namizəd ölkələr sırasındadır.