ABŞ-da aralıq seçkilərindən sonra fond bazarlarında kəskin ucuzlaşma qeydə alınıb. Texnologiya şirkətlərinin səhmlərində satışlar güclənib, əsas birja indeksləri ciddi itkilərlə üzləşib. Eyni zamanda Yaxın Şərqdəki gərginlik fonunda dünya bazarında neftin qiyməti yenidən yüksəlib.
Redaksiya xəbər verir ki, noyabrın 5-də Nyu-York birjasında Dow Jones indeksi gün ərzində 1000 bənddən çox itirərək 2 faizdən artıq geriləyib. S&P 500 indeksində azalma 3 faizi, texnologiya şirkətlərinin üstünlük təşkil etdiyi Nasdaq indeksində isə 4 faizi ötüb.
Nasdaq oktyabrın 6-da qeydə aldığı ən yüksək səviyyədən 10 faizdən çox geriləyərək ticarət zamanı korreksiya zonasına daxil olub.
Birjalardakı ucuzlaşma ABŞ-da Demokratlar Partiyasının seçki uğurlarından sonra süni intellekt (Sİ) sektoruna daha sərt tənzimləmələrin tətbiq oluna biləcəyi ilə bağlı investor narahatlıqları ilə əlaqələndirilir.
Xüsusilə məlumat mərkəzlərinin tikintisinə mümkün məhdudiyyətlər çip istehsalçıları və Sİ infrastrukturu ilə məşğul olan şirkətlərin səhmlərinə təzyiq göstərib.
Məlumata görə, Marvell Technology şirkətinin səhmləri 13 faizdən çox, Nvidia və Broadcom-un səhmləri isə 8 faizdən artıq ucuzlaşıb.
Məlumat mərkəzləri sektorunda fəaliyyət göstərən Applied Digital şirkətinin səhmləri 15 faizdən çox, Core Scientific-in səhmləri isə 11 faizdən artıq dəyər itirib.
Bazarlardakı qeyri-müəyyənlik investorların narahatlıq səviyyəsini əks etdirən VIX indeksində də özünü göstərib. “Qorxu indeksi” kimi tanınan göstərici əvvəlki günün 16,61 səviyyəsindən 27,46-ya yüksələrək gün ərzində təxminən 65,3 faiz artıb.
Fond bazarlarında enişin əksinə olaraq, neft qiymətləri yenidən bahalaşıb. Əvvəlki gün 8 faizdən çox ucuzlaşan Brent markalı neftin yanvar fyuçerslərinin qiyməti 2,8 faiz artaraq bir barel üçün 97,3 dollara çatıb.
ABŞ-ın West Texas Intermediate (WTI) markalı nefti isə 2,67 faiz bahalaşaraq 90,5 dollardan ticarət olunub.
Neftin bahalaşmasında ABŞ və İran arasındakı hərbi qarşıdurma ilə bağlı qeyri-müəyyənlik, eləcə də Hörmüz boğazında dəniz daşımalarının təhlükəsizliyinə dair narahatlıqlar rol oynayıb.
İran İslam İnqilabı Keşikçiləri Korpusunun açıqlamasına görə, Hörmüz boğazında müəyyən edilmiş marşrutlardan kənarda hərəkət edən iki neft tankerində və bir yedək gəmisində yanğın baş verib.
Bildirilib ki, tankerlərdən biri dəniz minasına toxunduqdan sonra alovlanıb. Digər tankerdəki yanğına müdaxilə etmək üçün yaxınlaşan yedək gəmisində də yanğın qeydə alınıb.
Bu məlumatlar Hörmüz boğazında enerji daşımalarının təhlükəsizliyi ilə bağlı narahatlıqları artırıb. Boğaz dünya neft və təbii qaz ticarəti baxımından strateji əhəmiyyət daşıyır.
Analitiklər investorların ABŞ seçkilərinin iqtisadi siyasətə mümkün təsirlərini və Yaxın Şərqdəki hadisələri izlədiklərini bildirirlər. Bazarların diqqətində olan digər mühüm göstərici isə noyabrın 6-da açıqlanması gözlənilən ABŞ-ın kənd təsərrüfatından kənar məşğulluq statistikasıdır.
Qeyd edək ki, açıqlanan indeks və qiymət göstəriciləri noyabrın 5-dəki ticarət prosesinə aiddir və sonrakı əməliyyatlarda dəyişə bilər.