Ukrayna Prezidenti Volodimir Zelenski ölkəsinin Patriot PAC-3 raketlərinin istehsalı üçün lisenziya almağa ümid etdiyini bildirib.
Redaksiya xəbər verir ki, Zelenski Ukraynanın bu imkanı əldə edəcəyi təqdirdə təkcə öz müdafiəsini gücləndirməyəcəyini, həm də ehtiyac duyan digər ölkələrə yardım edə biləcəyini deyib.
Onun sözlərinə görə, xüsusilə Yaxın Şərqdəki son hadisələr hava müdafiə sistemlərinə tələbatın nə qədər yüksək olduğunu göstərir.
“Biz hələ Patriot istehsalı üçün lisenziya almamışıq, amma gələcəkdə buna nail olacağımıza və ya öz sistemimizi inkişaf etdirəcəyimizə ümid edirəm”, — deyə Zelenski bildirib.
Patriot PAC-3 raketləri ballistik raketlərə, qanadlı raketlərə və hava hədəflərinə qarşı istifadə olunan ən müasir hava müdafiə vasitələrindən biri hesab olunur.
Kiyev uzun müddətdir Qərbdən Patriot sistemləri və raketləri üçün əlavə tədarük tələb edir. Ukrayna hesab edir ki, yerli istehsal hüququ hava hücumlarından müdafiə imkanlarını daha dayanıqlı edə bilər.