Rusiya Xarici İşlər Nazirliyinin sözçüsü Mariya Zaxarova Ukrayna Prezidenti Volodimir Zelenskinin son Rusiya hücumları ilə bağlı açıqlamasına istehzalı cavab verib.
Redaksiya məlumat verir ki, Zaxarova Zelenskinin Rusiyanın Ukraynaya qarşı ən uzunmüddətli kütləvi hücumlarından birinin ABŞ Prezidenti Donald Trampın Çin səfəri zamanı baş verməsindən şikayətləndiyini bildirən media məlumatlarını şərh edib.
Zaxarova bildirib ki, Kiyev istəsə, bununla bağlı “qadağan fərmanı” verə bilər. O, Ukrayna tərəfinin daha əvvəl Moskvadakı paradla bağlı mövqeyinə eyham vuraraq, “parada icazə verdikləri kimi hücumu da ləğv edə bilərlər” ifadəsini işlədib.
Rusiya rəsmisi, həmçinin Ukrayna Prezident Ofisinin rəhbəri Andrey Yermakla bağlı iddialara da istehza edib. Zaxarova onun “falçı” ilə bağlı qalmaqalını xatırladaraq, həmin şəxsin indi “sehr edə biləcəyini” deyib.
Açıqlama Rusiya və Ukrayna arasında informasiya müharibəsinin daha da sərtləşdiyi fonunda səslənib. Moskva son hücumları hərbi hədəflərə qarşı əməliyyat kimi təqdim edir, Kiyev isə bu zərbələrin mülki infrastruktura və əhaliyə ciddi ziyan vurduğunu bildirir.