Ukraynanın xarici işlər naziri Andrey Sıbiha üçtərəfli danışıqların bərpa olunduğunu və hərbi əsirlərin mübadiləsi barədə razılıq əldə edildiyini açıqlayıb. Nazir həmçinin Ukrayna Prezidenti Volodimir Zelenski ilə Rusiya Prezidenti Vladimir Putin arasında birbaşa görüşün keçirilməsinə çağırıb.
Redaksiya məlumat verir ki, Sıbiha danışıqlar prosesində əldə olunan razılaşmanı müsbət addım kimi təqdim edib və Ukraynanın gərginliyin azaldılmasında maraqlı olduğunu vurğulayıb.
“Biz üçtərəfli danışıqları bərpa etdik və hərbi əsirlərin mübadiləsinə dair razılıq əldə etdik”, – deyə Ukraynanın xarici işlər naziri bildirib.
Sıbiha Kiyevin növbəti mərhələ ilə bağlı mövqeyini də açıqlayıb.
“Mesajımız aydındır: gərginliyin azaldılması və Ukrayna Prezidenti Volodimir Zelenski ilə Rusiya Prezidenti Vladimir Putin arasında görüşün keçirilməsi”, – deyə nazir qeyd edib.
Hərbi əsirlərin mübadiləsi ilə bağlı razılaşmanın icra tarixi, əhatə edəcəyi şəxslərin sayı və digər detalları açıqlanmayıb.
Zelenski ilə Putin arasında mümkün görüşün vaxtı və məkanı barədə də məlumat verilməyib.