ABŞ-ın Türkiyədəki səfiri, Suriya və İraq üzrə xüsusi nümayəndəsi Tom Barrak Hörmüz boğazı ilə bağlı təhlükəsizlik risklərinə diqqət çəkərək Türkiyə, İraq və Suriyanın strateji əhəmiyyətini vurğulayıb.
Redaksiya məlumat verir ki, Barrak Hörmüz boğazından asılılığın yaratdığı risklərə qarşı alternativ marşrutların vacibliyinə toxunub.
“Hər kəs Hörmüz boğazı ilə bağlı ehtiyat təminatına ehtiyac olduğunu deyir”, – deyə ABŞ rəsmisi bildirib.
Barrakın sözlərinə görə, regionda alternativ nəqliyyat və enerji marşrutlarının formalaşdırılmasında Türkiyə, İraq və Suriya mühüm rol oynaya bilər.
“Hansı istiqamətdən getməyinizdən asılı olmayaraq, İraq, Türkiyə və Suriya bu keçidin açarıdır”, – deyə o vurğulayıb.
ABŞ nümayəndəsinin açıqlaması Hörmüz boğazı ətrafındakı təhlükəsizlik riskləri fonunda region ölkələrinin strateji mövqeyinin əhəmiyyətini ön plana çıxarır.
Barrak alternativ marşrutlarla bağlı konkret layihə və ya razılaşma barədə əlavə məlumat verməyib.