Ukrayna Rusiyaya qarşı genişmiqyaslı dron hücumu həyata keçirib. Rusiya tərəfinin məlumatına görə, hücumda 100-dən çox pilotsuz uçuş aparatı istifadə olunub və ölkənin bir neçə regionunda hava hücumundan müdafiə sistemləri işə salınıb.
Redaksiya Rusiya Müdafiə Nazirliyi və beynəlxalq agentliklərə istinadla xəbər verir ki, gecə saatlarında Rusiya ərazisi üzərində yüzlərlə Ukrayna dronu vurulub. Hücumların Moskva vilayəti, Leninqrad vilayəti və digər qərb regionlarını əhatə etdiyi bildirilir.
Leninqrad vilayətində əsas hədəflərdən birinin Primorsk limanı olduğu qeyd olunur. Bu liman Rusiyanın Baltik dənizi üzərindən neft ixracı üçün mühüm infrastrukturlarından biri sayılır.
Hücum nəticəsində bəzi bölgələrdə hava nəqliyyatında gecikmələr yaranıb. Sankt-Peterburqdakı Pulkovo hava limanında bir sıra reyslərin təxirə salındığı və təhlükəsizlik tədbirlərinin gücləndirildiyi bildirilir.
Ukrayna tərəfi Rusiyanın neft, hərbi və logistika infrastrukturuna zərbələri Moskvanın Ukrayna şəhərlərinə qarşı davam edən raket və dron hücumlarına cavab kimi təqdim edir. Rusiya isə bu hücumları öz ərazisinə qarşı genişmiqyaslı PUA əməliyyatı kimi qiymətləndirir.