8 dekabr 2024-cü ildə Suriyada köhnə rejimin devrilməsi Türkiyənin bu ölkə ilə ticarət əlaqələrini yeni mərhələyə daşıyıb. Bu çərçivədə Türkiyə və Suriya sənayedən nəqliyyata, enerjidən ticarətə qədər bir çox istiqamətdə yeni əməkdaşlıqlara diqqət yetirir. Siyasi və diplomatik görüşlər axını ilə paralel olaraq iqtisadi münasibətlərin də inkişaf etdirilməsi məqsədilə ardıcıl görüşlər keçirilir.
Redaksiya məlumat verir ki, son olaraq Xarici işlər naziri Hakan Fidan dünən Suriyaya səfər edib. Bu səfər çərçivəsində Fidan Suriya Respublikasının prezidenti Əhməd Şara və Ukraynanın dövlət başçısı Volodimir Zelenski ilə görüşüb. Görüşdə regional inkişaflar və təhlükəsizlik məsələləri ilə yanaşı, tərəflərin ikitərəfli münasibətlərinin inkişaf etdirilməsi və iqtisadi əməkdaşlığın artırılması mövzuları müzakirə olunub.
Əməkdaşlıqları genişləndirmək məqsədilə sabah Türkiyə-Suriya İqtisadiyyat və Ticarət Birgə Komitəsinin (JETCO) ilk dövr toplantısı keçiriləcək. Toplantının Ticarət naziri Ömər Bolat və Suriyanın İqtisadiyyat və Sənaye naziri Nidal Şaarın həmsədrlikləri ilə təşkil olunması planlaşdırılır. Toplantı çərçivəsində işgüzar dairələrin nümayəndələrinin iştirakı ilə Türkiyə-Suriya İş və İnvestisiya Forumu da keçiriləcək və forumda enerji, inşaat, səhiyyə, qida, kənd təsərrüfatı, heyvandarlıq, logistika, təhsil və tekstil sektorlarından iş adamlarının ikitərəfli görüşlər aparması gözlənilir. Bundan əlavə, forumda logistika, bankçılıq və podratçılıq mövzuları üzrə panellərin də keçirilməsi nəzərdə tutulur.
Əlaqələrin bir çox sahədə əməkdaşlıqları inkişaf etdirəcəyi və iki ölkə arasında ticarətdə yeni rekordların qapısını açacağı proqnozlaşdırılır. Suriya bu il Türkiyənin “ixracatda hədəf ölkə” siyahısına daxil edilib və xüsusilə son dövrdə bu ölkəyə ixracın artımı diqqət çəkir. İxrac 2025-ci ildə əvvəlki illə müqayisədə təxminən 60% artaraq 2,2 milyard dollardan 3,5 milyard dollara yüksəlib. Ötən ilki ixracda 232,7 milyon dollarla “dəyirmançılıq məhsulları, malt, nişasta, inulin, buğda qlütəni” bölməsi birinci yerdə olub.
Bu ilin ilk iki ayında “ixracatda hədəf ölkə” qərarından sonra göstəricilər önə çıxıb. Köhnə rejimin devrilməsindən sonra Türkiyənin Suriyaya ixracı 2025-ci ilin ilk iki aylıq dövründə əvvəlki ilin eyni dövrü ilə müqayisədə 356,6 milyon dollardan 47,5% artımla 526,2 milyon dollara çatıb. Türkiyənin bu il iki ayda Suriyaya ixracı isə illik 26,7% artımla 666,7 milyon dolları ötüb. Sözügedən məbləğ Türkiyə Statistika İnstitutunda (TÜİK) məlumatların yer aldığı 2013-cü ildən bəri rekord kimi qeydə alınıb. İxracda 72,7 milyon dollarla “mühərrikli avtomobil nəqliyyat vasitələri, traktorlar, velosipedlər, motosikletlər və digər quru nəqliyyat vasitələri, onların hissələri, parçaları və aksessuarları” bölməsi birinci yerdə qərarlaşıb.