Adnan Əhmədzadə adı keçən yarım milyon manatlıq kommersiya məhkəməsi üzrə DTX daxil dövlət qurumlarına müraciət olunub.
Redaksiya-nın əldə etdiyi məlumata görə, Kommersiya Məhkəməsində baxılan bir iş artıq məhkəmə zalının sərhədlərini aşaraq dövlət qurumlarının diqqətinə çıxarılıb.
Bildirilir ki, məsələ ilə bağlı ITAC MMC tərəfindən Dövlət Təhlükəsizliyi Xidməti (DTX) daxil olmaqla aidiyyəti instansiyalara rəsmi müraciət edilib.
İddialara görə, əsas mübahisə Xaçmaz rayonunda hektarlarla ərazini əhatə edən istirahət mərkəzinin tikintisi zamanı yaranıb. Layihənin sifarişinin media məlumatlarında Grandmart və Bolmart supermarket şəbəkələrinin idarə heyətində təmsil olunduğu bildirilən şəxslərin rəhbərliyi altında verildiyi qeyd olunur.
Tikinti işləri ITAC MMC-yə həvalə edilib. Ödəniş və maliyyə məsələlərinin əsasən Grandmart şəbəkəsinin baş ofisində həll olunduğu bildirilir.
Lakin iddialara əsasən, tikinti prosesi davam etdiyi müddətdə layihədə dönüş nöqtəsi baş verib.
Dönüş nöqtəsi və tərəflər arasında gərginlik
Məlumata görə, idarə heyətində təmsil olunduğu bildirilən şəxs sonradan öz şəxsi inşaat şirkətini yaradaraq layihəni həmin şirkət vasitəsilə davam etdirmək istəyib. Bu addımın mövcud müqavilə öhdəliklərinə zidd olduğu irəli sürülür.
Bundan sonra tərəflər arasında münasibətlərin kəskinləşdiyi qeyd edilir.
İddialarda daha bir məqam vurğulanır: bildirilir ki, yeni yaradılmış şirkət vasitəsilə ITAC MMC-yə məxsus avadanlıq və tikinti materiallarının götürüldüyü və inşaat işlərinin həmin resurslarla davam etdirilməsinə cəhd göstərildiyi irəli sürülür.
Məhz bu mərhələdən sonra mübahisənin məhkəmə müstəvisinə keçdiyi bildirilir.
Qanuniliklə bağlı suallar
Mübahisə yalnız maliyyə məsələləri ilə məhdudlaşmır.
İddialara görə, geniş ərazini əhatə edən istirahət mərkəzinin tikintisi ilə bağlı:
• aidiyyəti dövlət qurumlarına rəsmi məlumat verilib-verilmədiyi,
• müvafiq icazələrin alınıb-alınmadığı
məsələləri də açıq qalır.
Bu məqamların da araşdırılması tələb olunur.
Yarım milyon manatlıq suallar
Məhkəmədə baxılan iş yarım milyon manata yaxın vəsaitlə bağlıdır. İddia olunur ki:
• vəsaitin hansı istiqamətdə xərcləndiyi,
• müqavilə öhdəliklərinin faktiki icra səviyyəsi,
• maliyyə hesabatlarının şəffaflığı
ilə bağlı aydınlıq yoxdur.
ITAC MMC-nin direktoru Elçin Rüstəmxan bildirib ki, kommersiya münasibətlərində əsas prinsip sübut və şəffaflıqdır və bütün mübahisəli məqamlar obyektiv araşdırılmalıdır.
Şirkət tərəfindən məsələ ilə bağlı Dövlət Təhlükəsizliyi Xidməti (DTX) daxil olmaqla aidiyyəti qurumlara rəsmi müraciət edildiyi bildirilir. Müraciətdə qeyd olunan halların yalnız məhkəmə çərçivəsində deyil, dövlət səviyyəsində də araşdırılmasının zəruri olduğu vurğulanır.
Hazırda iş Kommersiya Məhkəməsinin icraatındadır. Dövlət qurumlarının müraciətə hansı formada reaksiya verəcəyi və araşdırmanın başlanıb-başlanmayacağı isə hələlik açıq qalır.
Adı hallanan Adnan Əhmədzadə və digər tərəflərin mövqeyi təqdim olunarsa, materiala əlavə ediləcək.